Seekh

seekh gaya hai woh ab

ki bahot fark hota hai

kisi ka haath thaamne mein

aur kisi ki rooh ko baandh lene mein

samajh hi gaya hai woh ab

ki vaade aksar poore karne ke armaan se nahi kiye jaate

ki ummeedon par kitni aasaani se paani fir jaata hai

aaj ki haqiqat par raaste banana seekh gaya hai

ki aane waale kal par bune sapne to aksar toot jaate hain

ki beete hue kal ki to sacchai hi badal chuki hai

ki dhoop bhi zyada ho to jala deti hai

ki baarish bhi zyada ho to gala deti hai

ki chizen banti hi hain tootne ke liye

ki saath hote hi hain chhootne ke liye

woh meri pehchaan, mera astitva hai

aur der se hi sahi, ab woh seekh gaya hai

ki har woh vidai jo use rula jaati hai

har woh vidai use kucch sikha jaati hai…

Khwaab

Kabhi kabhi dukh is baat ka bhi hota hai

ki ab tumhari yaad palkon par koi harkat nahi karti

kya ab tumhare na hone ki aadat padne lagi hai

ya shayad ab palkein bhi thak gayi hain

shayad paani sookh gaya hai

kabhi kabhi dard is baat ka bhi hota hai

ki un palon ki soch ab chehre par muskaan nahi laati

kya ab un palon ki ehmiyat hi kam ho gayi hai

ya shayad ab woh sirf ek bhula bisra khwab ban ke reh gaye hain

jiski haqiqat hi ek dhundli si tasveer ki tarah hai

jispar kone mein rakhe rakhe dhool ki parat chadh gayi hai

kabhi kabhi vyathit is baat se bhi hota hun

ki kya kucch aur palon ki meri guhaar galat thi

kya thode se chain ki ummeed bhi najayaz thi

kya tumhe paane ki chahat hi bebuniyaad thi

jawaab sirf tum hi de sakte the, mujhe mila nahi

tumhe dosh dene ki bohot koshish ki maine

tumse nafrat karne ki, tumhe bhool jaane ki bhi koshish ki

but mujhse ho na saka

main khud ko bhi bhoolne laga

tumhare bina shayad main ab kisi kaam ka nahi raha...

Imtehaan

ab to zindagi aisi lagne lagi hai

ki bina taiyari imtehaan mein baitha hun

intezaar hai ki kab ghanti baje aur main nikal jaoon

beech mein uthne ka khayal bhi aata hai kai baar

himmat agar juta bhi loon to tham jaata hun

ki kahin un ko bura na lag jaaye...

Vidambna

Ab to unke liye dua bhi nahi nikalti

shayad is andhere ne mujhe kathor bana diya hai

yeh kaisi kudrat hai ki kal tak jinki har khushi ka main hissa hota tha

aaj unhi ki muskurahat dekhkar ek jalan si hoti hai

Unse chupaane ki koshish karta hun

ki asliyat mein kitna kamzor ban gaya hun

yeh kaisi kismat hai ki kal tak jinki aankhon mein itni raatein guzar jaati thi

aaj unhi se nazren milane se darr jaata hun main

Sach kahun to ab unhe dekhkar dil baith sa jaata hai

yeh kaisi kudrat hai, kaisi bebasi hai

ki kal tak jinka haath thaamkar duniya jeet lene ka bharosa tha

aaj unhi ki ek jhalak bhar se sehem jaata hun main...

Aaj Woh Nahi Hain...

un palon ko main bhool jaana chahta hun

isliye nahi ki unki yaad mujhe dukh pahonchati hai

isliye ki unki yaad mujhe ek aise safar ki yaad dilati hai

jisme jab tak woh the, na manzil ki chinta thi, na raaste ka thikana

par yeh pata tha ki safar accha kat jayega

aaj woh nahi hain

aaj bhi manzil ki chinta nahi hai, na raaste ka thikana hi hai

aaj to safar mein chalne ki chah hi khatm ho gayi hai

aaj bas theher jaane ka mann hota hai

aaj woh nahi hain, aaj kucch nahi hai...

woh pal mujhe yaad dilate hain ki zindagi kya ho sakti thi

woh na hote to shayad mujhe ehsaas hi nahi ho pata

shayad main anjaana hi zyada khush rehta

shayad main shaam ki halki roushni mein hi waqt kaat leta

unhone dhoop dikhakar waapas le li

ab kaise andhere mein rahun, law hi bujh gayi hai

aaj woh nahi hain, aaj kucch nahi hai...

aisa nahi hai ki ab woh pehle se kam yaad aate hain

par pehle jahaan unki yaad ek meetha sa ehsaas tha

ab ek zakhm ki tarah hai, jo bhar nahi raha

main nahi jaanta ki yeh bharega ya nahi

main jaanta hun ki ek tees to hamesha rahegi

shayad unhone jo bhi kaha tha sab jhooth tha

shayad main hi andha ho gaya tha

roshni to ab bhi nahi hai

par pehle jahaan sab safed tha

aaj ghupp andhera hai

aaj woh nahi hain, aaj kucch nahi hai...

woh kehte hain maine bhoolne ki koshish nahi ki

woh kehte hain ki ab yahi nayi sachchai hai

sach to yeh hai ki unhe bhulane ki raah mein

main khud ko hi kho baitha hun

ab gumnaam, anjaan sa khada hun yahaan

log dekhkar, kucch pal ruk kar aage badh jaate hain

main unke saath bhi muskura leta hun

ki koi mere andar na jhaank le

ki koi us andhere ko na dekh le

ki koi pooch na le ki kya hua

kyunki main bata nahi paunga

aaj woh nahi hain, aaj kucch nahi hai...

Aansoon

Aansoon jab apne astitva ki talaash mein saath chhod dete hain aankhon ka

Main unse shikayat nahi rakhta

Ki is toote shareer se door hokar agar unhe accha lagta hai

To isme galat kya hai...

Bas yun hi

Unki yaad jab raat ko sone nahi deti

Hum to tab bhi khud ko hi dosh dete hain

Ki unhe bhoolna yaad na raha...